kuldeep makwana

ફિલ્મનો પ્રીમિયર નિર્માતા કુલદીપ મકવાણાના શહેર વલસાડ ખાતે ૨૨ મે એ યોજાશે. જેમાં ફિલ્મના તમામ લીડ કલાકારો હાજરી આપશે

    નિર્માતા કુલદીપ મકવાણાની ફિલ્મ ‘સાજન તારા વિના સુની જીંદગી’ જે ફિલ્મ ૨૨ મે ના દિવસે રીલીઝ થવા જઈ રહી છે. આર.કે.સી. ફિલ્મ્સ પ્રોડકશન (વલસાડ) ના બેનરમાં બનેલી આ ફિલ્મમાં આજના હાર્ડ એન્ડ ફાસ્ટ જમાનામાં યુવાનો પોતાના માતા પિતાના કહ્યામાં ન હોય અને પછી જે ભોગવવું પડતું હોય છે તે અને બીજો મહત્વનો મુદ્દો અત્યારે ચગેલો છે તે એ કે ભ્રુણ હત્યા, સ્ત્રી શોષણ વગેરેને ફિલ્મના નિર્માતાએ આ ફિલ્મમાં સરસ રીતે આલેખી છે. નિર્માતાની સાહિત્ય પ્રત્યેની રૂચી અને તેમના પિતાનું એક સપનું કે આવી એક ફિલ્મ બનાવી લોકો સમક્ષ મુકીએ જેથી વધુ નહિ તો થોડી લોકોમાં જાગૃતિ આવે. સમાજ માટે કોઈ સંદેશ, સારી સ્ટોરી, સારા ગીતો અને ફિલ્મની સારામાં સારી સ્ટારકાસ્ટ ફિલ્મને વધારે માણવાલાયક બનાવે છે. તેઓ પ્રથમવાર ફિલ્મ બનાવવા જઈ રહ્યા હતા અને આ લાઈનનો કોઈ અનુભવ તો હતો નહિ. છતાં પણ એક સાહસ કર્યું અને દિગ્દર્શક પર પસંદગી ઉતારી જે નિર્માતાની કસોટીમાં પાર ઉતરી શક્યા. જેમાં મનોજ ડોબરિયા, તનસુખ ગોહિલ અને બાબુ ગંગેર છે. કુલદીપ મકવાણા જણાવે છે કે, મને એવા એવા દિગ્દર્શકો મળેલા કે મને કહેલું કે હું તમને આટલા બજેટમાં ફિલ્મ બનાવી આપીશ પણ અમે ભરત શર્મા અને પંકજ ખત્રીના સહયોગથી આ પાર પાડી શક્યા. ફિલ્મ ડિસ્ટ્રીબ્યુટર વંદનભાઈ શાહ તરફથી ઘણો સહયોગ સાંપડ્યો.

પ્ર – ફિલ્મથી આપની અપેક્ષા?

ઉ – મને સો ટકા વિશ્વાસ છે કે ભલે મે પહેલી વખત ફિલ્મ બનાવી હોય પણ ફિલ્મનું મેકિંગ તગડું છે. અત્યાર સુધી જે નથી આવ્યું તે લાવવાનો પ્રયત્ન મે મારી ફિલ્મમાં કર્યો છે. જે લોકોની આતુરતા છે તેવી એકદમ ફૂલટુ ડ્રામા સ્ટોરી છે. ફિલ્મ જોઇને દર્શકો હસતા હસતા થીયેટરમાંથી બહાર નીકળશે તે મારે વલસાડમાં અને ગુજરાતના દરેક સિનેમાઘરોમાં જોવું છે. આધુનિક જમાના સાથે કદમ મેળવીને ફિલ્મમાં દરેક પાસા પર અમે એકમ સચોટ અને ધગશથી કામ કર્યું છે. જેમાં મને કલાકારોનો પણ પૂરો સપોર્ટ રહ્યો. આ મારી ફિલ્મ ‘સાજન તારા વિના સુની જીંદગી’ માં સ્ટોરીને ક્યાય પણ પાટા પરથી ઉતારવા નથી દીધી. ફિલ્મની વાર્તા અને ગીતો એકદમ સાથે આગળ વધે છે જેથી દર્શકોને પણ ફિલ્મ જોવાની મજા આવે. ક્યારેક એવું બનતું હોય છે કે ફિલ્મ ક્યાય જતી હોય ગીતો ક્યાય જતા હોય. મારી ફિલ્મમાં અમે આ વાતનું ખાસ ધ્યાન રાખ્યું છે.

પ્ર – ફિલ્મના ગીતો?

ઉ – મારી ફિલ્મમાં અમે છ ગીતો મુક્યા છે જેમાં એક ડાયરો છે. બે લવ સોંગ છે’ જેને શૈલેશ – ઉત્પલ જેવા પ્રખ્યાત સંગીત બેલડીનું સંગીત સાંપડ્યું છે. અત્યારે અમે ફિલ્મના ગીતો લોન્ચ કરી દીધા છે જેમાં ટાઈટલ સોંગ ખૂબ કર્ણપ્રિય બન્યું છે. ‘સાસરીયે નહિ જઉં’ ગીત પણ બંને હિરોઈનો કિરણ આચાર્ય અને મરજીના દિવાન પર ફિલ્માવવામાં આવ્યું છે તે પણ ખૂબ જ લોકપ્રિય થશે. જે એવા તબક્કે ગાવામાં આવ્યું છે કે તે પોતાના પરિવારને છોડીને ક્યાય લગ્ન બંધને બંધાઈને જવા નથી માગતી. બે લવ સોંગના શબ્દોને પાર્થિવ ગોહિલ અને સાધના સરગમનો મધુરો કંઠ મળ્યો છે.

    ફિલ્મના નિર્માતા કુલદીપ મકવાણા છે. દિગ્દર્શન મનોજ ડોબરિયા, તનસુખ ગોહિલ અને બાબુ ગંગેર કરેલું. કથા – પટકથા, સંવાદ અને ગીતો મનોજ ડોબરીયાના જ છે. ફિલ્મના દ્રશ્યોને કેમેરે કંડાર્યા છે સુનીલ વાઘેલા (જુનાગઢ) એ. સંકલનકાર છે પ્રફુલ ચૌહાણ (રંગોળી વિઝાન), ફિલ્મના કલાકારોમાં એક્શન કિગ જીત ઉપેન્દ્ર, રૂપની રાણી કિરણ આચાર્ય, નમણી નાગરવેલ મરજીના દિવાન, શ્રીકાંત સોની, દેવેન્દ્ર પંડિત, ચારુબેન પટેલ, ઝાકીર ખાન, નરેશ પટેલ, સાગર રાજ, સંજય દેવ (બોબી), કરણ રાજપૂત, મીના સલમા, આરતી, રવિના, રૂપલ મહેતા, યશોધર જાની, પારુલ વાઘેલા વગેરે છે. ડાન્સ માસ્ટર અશ્વિન માસ્ટરજી, ફાઈટ માસ્ટર મહંમદ અમદાવાદી છે. ફિલ્મનો પ્રીમિયર નિર્માતા કુલદીપ મકવાણાના શહેર વલસાડ ખાતે ૨૨ મે એ યોજાશે. જેમાં ફિલ્મના તમામ લીડ કલાકારો હાજરી આપશે.    

n  ગજ્જર નીલેશ 

kuldeep makwana

સાજણ તારા વિના સુની જીંદગી ફિલ્મ રીવ્યુ

    થોડા સમય પહેલા જ એક ફિલ્મ રીલીઝ થઇ નિર્માતા કુલદીપ મકવાણાની ફિલ્મ ‘સાજણ તારા વિના સુની જીંદગી’ જેમાં ગુજરાતી ફિલ્મોના જાણીતા કલાકારોએ અભિનય આપ્યો. ગુજરાતી ફિલ્મોનો એક્શન સ્ટાર જીત ઉપેન્દ્ર આખી ફિલ્મમાં છવાયેલો રહ્યો સાથે સાથે કિરણ આચાર્ય પણ ફિલ્મમાં મેદાન મારી ગઈ. સોશિયલ નેટવર્કિંગ સાઈટ પર બંધાતા સંબંધો અને તેની આપણી જીંદગી પર પડતી અવળી અસરો જેના લીધે આપણે ખાસ કરીને આપણા સમાજમાં રહેતી સ્ત્રીઓનું કેવી રીતે શોષણ થાય છે. તે મુદાને દિગ્દર્શક મનોજ ડોબરિયા, તનસુખ ગોહિલ અને બાબુ ગંગેરે પડદા પર સાકાર કર્યું. ફિલ્મની બીજી અભિનેત્રી મરજીના દિવાન પોતાની આંખોના અભિનય સિવાય ખાસ્સું કંઇ ઉકાળી શકી નહિ. ફિલ્મના ચરિત્ર કલાકારોમાં ચારૂબેન પટેલ વિષે તો ગુજરાતી ફિલ્મોના રસિયાઓ જાણે જ છે કે તેઓ વેમ્પનું પાત્ર બખૂબી ભજવી શકે છે. તેમાં તેમને મહારત હાંસલ છે. શ્રીકાંત સોનીનો અભિનય સારો રહ્યો સાથે સાથે દેવેન્દ્ર પંડિત કંઇક અલગ લહેજામાં જોવા મળ્યા.

    

    ફિલ્મને અત્યારે વેકેશનમાં રીલીઝ કરાઈ હોવા છતાં પ્રેક્ષકો બહુ ઓછા મળ્યા છે. સાથે સાથે ગુજરાતમાં તાપનું પ્રમાણ પણ વધારે રહેતા ગુજરાતી ફિલ્મોના દર્શકોએ ફિલ્મ જોવાનું ટાળ્યું હતું. ફિલ્મમાં જીત ઉપેન્દ્રના મોટા ભાઈનું પાત્ર નરેશ પટેલે ભજવેલું જેને તમે ‘મૈયરમાં મનડું નથી લાગતું – ૨’ માં હિતેન કુમારના જીજાજી ડો. રાજેશ તરીકે જોઈ ચુક્યા છો અને નિર્માતા – દિગ્દર્શક જસવંત ગાંગાણીની ૨૬ જુલાઈના રોજ રીલીઝ થઇ રહેલી હિન્દી ફિલ્મ ‘બેઝુબાન ઈશ્ક’ માં તેઓ એક રાજસ્થાની ટ્રક ડ્રાઈવરના રોલમાં જોવા મળશે. તેમના પત્નીના રોલમાં આરતી (આશ્કા) પરમાર છે જેને તમે હિન્દી ફિલ્મ ‘બોલીવૂડ વિલા’ માં જોઈ શકો છો તથા ગોવિંદભાઈ પટેલની ફિલ્મ ‘હું તારી મીરાને તું મારો શ્યામ’ માં જોયા હશે. ફિલ્મના આસી. દિગ્દર્શક તનસુખ ગોહિલ પણ ફિલ્મમાં કોમેડી રોલમાં જમાવટ કરી હતી. જેઓએ મોટા ઘરના માન, સુહાગ, સાથી રે સાથ ના છૂટે જેવી ફિલ્મોની કથા પટકથા અને સંવાદો પણ લખી ચુક્યા છે. તેમની સાથે હરેશ વડાલીયાએ પણ કોમેડીમાં રંગ રાખ્યો હતો. કોમેડીમાં છાયા શુકલ પણ જમના ફઈ તરીકે જોવા મળ્યા હતા. આ રોલમાં તેમને વેડફી નાખવામાં આવ્યા હોય એવું લાગ્યું. જેમાં તેમની સાથે એક સીન પાણી ભરવા નળ સ્ટેન્ડ પર ભેગા થયા હોય ત્યાં કુલદીપ મકવાણાના બહેન મીના પણ જોવા મળ્યા હતા. આ સાથે વલસાડના જ એક કલાકાર યશોધર જાની જેની સગાઇ ફિલ્મના હીરોની બહેનની સાથે થવાની હોય છે તે હતા. એકાદ દ્રશ્ય પૂરતા તેઓ પણ ફિલ્મમાં દેખાયા હતા. છાયા શુકલ વધુમાં જણાવે છે કે મને આ ફિલ્મમાં કર્યાનો બહુ અફ્સોસ રહી ગયો છે. એક દિગ્દર્શકની જવાબદારી શાંતિથી કામ કરવાની હોય છે. બીજા સાથે ગેરવર્તણુક કરવાની નહિ. સેટ પર બીજા સાથી કલાકારો સાથે કે ભલે નાનો સ્પોટબોય હોય તેની સાથે અપશબ્દો બોલીને વાત ન કરાય. મને આ રોલ માટે બહુ અફસોસ છે કારણકે એક કલાકારને કોઈ જરૂરિયાત નથી હોતી છતાં પણ તમે એમને કામ છે એમ કહીને બેસાડી રાખો તો તેને દુખ થાય છે. જાણવા મળ્યા મુજબ છાયા શુકલના ફિલ્મમાં જેટલા પણ સીન છે તેના કરતા ક્યાંય વધારે સીન હતા પણ દિગ્દર્શકની ગેરવર્તાનુંકને કારણે તેઓ આ ફિલ્મમાંથી અધવચ્ચેથી ખસી ગયા હતા.

n  ગજ્જર નીલેશ