jeet upendra

‘વ્હાલનો વારસદાર’ નો વ્હાલસોયો પુત્ર જીત ઉપેન્દ્ર, અભિનય તેની રગેરગમાં છે

    ત્રણ દાયકા જેટલો સમય થયો જીત ઉપેન્દ્રને ફિલ્મ ઈંડસ્ટ્રીમાં. હિન્દી અને ગુજરાતી ઉપરાંત એણે રાજસ્થાની, બંગાળી, ભોજપુરી, તમિળ અને મલયાલમ ભાષાની ફિલ્મોમાં કામ કર્યું. એકશન અભિનેતાની ઈમેજ ધરાવનાર જીત તેની ગુજરાતી ફિલ્મ ‘શિખંડી’માં નવા અવતારમાં જોવા મળ્યા હતા. અહીં એ ફિલ્મ ઉપરાંત જિંદગી વિશે દિલથી વાત કરે છે. હિન્દી ફિલ્મો ‘વ્યંઢળ’ના પાત્ર પર ઘણી ફિલ્મો બની ચૂકી છે, પણ ગુજરાતીમાં વ્યંઢળની જિંદગી પર આ પ્રથમ ફિલ્મ બની હતી. ગુજરાતી ફિલ્મોમાં તો કામ કર્યું જ છે પરંતુ તેઓને જયારે બીજી ભાષાની ફિલ્મો વિષે પૂછવામાં આવ્યું કે તે ફિલ્મો કરતી વખતે ભાષા નથી નડતી? તો તેમણે કહેલું કે, મલયાલમ મારી માતૃભાષા એટલે એ સહેલું જ હતું. બીજી ભાષાઓમાં ફિલ્મો કરવી એ કંઈ તકલીફવાળું નથી હોતું. તેમાં કઈ મોટી વાત કે રોકેટ સાયન્સ નથી. મને નસીરુદ્દિન શાહની વાત યાદ છે. એ કહેતા કે કલાકારને કોઈ ભાષા નથી હોતી. હાલ જીત ઉપેન્દ્ર નિર્માતા શૈલેશ શાહની ફિલ્મ ‘વ્હાલનો વારસદાર’ માં આવી રહ્યા છે. જે ફિલ્મ બાપ દીકરાના સંબંધ અને સંજોગો પર આધારિત છે. ફિલ્મની વાર્તા ખૂબ સ્ટ્રોંગ લખવામાં આવી છે અને આમેય જીત પાસે જેવા તેવા પત્રોની અપેક્ષા તો તેના ચાહકો પણ નથી રાખતા.

પ્ર – ફિલ્મના આપના પાત્ર વિષે?

ઉ – ફિલ્મનો રોલ કહીશ પણ વધુ નહિ કહું. આમાં દર્શકો મને નેગેટીવ પાત્રમાં જોશે કે પોઝીટીવ પાત્ર હશે તે હું અત્યારે નહિ કહું. ફિલ્મમાં એક વ્યક્તિની જીવન સફર બતાવવામાં આવી છે. ફિલ્મના નિર્માતા શૈલેશ શાહ અને દિગ્દર્શક વસંત નારકર સાથે હું બીજી ફિલ્મ કરી રહ્યો છું. તેમની સાથે કામ કરવાની મજા જ કંઇક અલગ હોય છે. બહુ ઓછા દિગ્દર્શકો હોય છે જે અભિનેતા બનીને કામ કરી જાણે છે. જેમાના વસંત નારકર છે. મારી પાસે તેમણે લેડી દબંગમાં કોમેડી કરાવી અને આ ફિલ્મમાં તેઓએ મારી પાસે સરસ કામ લીધું છે. તેમને અભિનયમાં જે જોઈએ છે તે તેઓ લીધા સિવાય ઝંખતા નથી. તેનામાં એ કાબેલિયત છે જે મે બીજામાં બહુ ઓછી જોઈ છે.

પ્ર – તમારા બીજા કલાકારો સાથેના અનુભવો જણાવશો.

ઉ – દિશા પટેલ સાથે આ મારી બીજી ફિલ્મ છે. તેની સાથે પણ કામ કરવાની મજા આવી. મેહુલ બુચ સાથે પણ આ મારી બીજી જ ફિલ્મ છે. (હશે છે) તેમની સાથે અગાઉ ‘હરપાલદે શક્તિના અમર અજવાળા’ માં મે કામ કરેલું છે. મારા ખાસ મિત્ર છે. સાથે સાથે ચીની રાવલ નામની અભિનેત્રી આ ફિલ્મમાં મારી પત્નીનું પાત્ર ભજવી રહી છે. શી ઈઝ માઈન્ડ બ્લોઇંગ એક્ટ્રેસ. ખૂબ જ સમજુ અને બધાથી અલગ સ્વભાવ છે તેનો. તેમની સાથે પણ કામ કરવાનું મને ગમ્યું.

પ્ર – તમે મરાઠી ફિલ્મ હજી નથી કરી?

ઉ - ઘણાં વર્ષો પહેલાં અરૂણ કર્ણાટકીની દીકરી પ્રિયા અભિનેત્રી હતી ત્યારે એમની મરાઠી ફિલ્મ કરવાનો હતો. કમનસીબે એમનું મૃત્યું થતા એ પ્રોજેક્ટ શરૂ ન થયો. મને મરાઠી ફિલ્મો કરવી છે. સારી ઓફર હશે તો ચોક્કસ સ્વીકારીશ.

પ્ર – શુટિંગ પત્યા પછી ફ્રેશ થવા શું કરો છો?

ઉ – શુટિંગ પૂરું કર્યા બાદ હું એકદમ હળવાશ અનુભવું છું. કોઈ સારા પુસ્તકો વાંચું છું. ટીવી પર જે નવા નવા પ્રોગ્રામો કે કોઈ ફિલ્મ જોઈ લઉં છું.

પ્ર – તમે તમારી કઈ ફિલ્મ આખી જોઈ છે?

ઉ – હું મારી દરેક ફિલ્મો જોવાનું ક્યારેય ચૂકતો નથી અને તે પણ થીયેટરમાં જ બેસીને જોઉં છું. કારણ કે, ત્યાં દર્શકોનો રિસ્પોન્સ જોઇને અને તેઓ મારી કઈ અભિનય અદા પર ફિદા છે તે જોઇને હું જાણું છું કે મારા ચાહકોને મારી પાસેથી શેની અપેક્ષા છે.

પ્ર – ગોવિંદભાઈ પટેલ વિષે?

ઉ – મે એમની સાથે કોઈ ફિલ્મ નથી કરી તેનું મને દુખ છે. મારા છૂટાછેડા પછી લગભગ મે છ – સાત વર્ષ સુધી કામ નહોતું કર્યું. તે દરમિયાન એક ફિલ્મ બની હતી ‘સંત શ્રી સવાભગત’. તે ફિલ્મનું કાસ્ટિંગ જયારે ચાલુ હતું ત્યારે ગોવિંદભાઈએ તેના ડિરેક્ટરને કહ્યું હતું કે, જીત ઉપેન્દ્ર નામે એક એક્ટર છે જે ઘણા સમયથી જોવા નથી મળી રહ્યો. તેમના હિસાબે હું તે રોલમાં પરફેક્ટ હતો. તેમણે મારો કોન્ટેક્ટ કર્યો ત્યારે હું તેમની સાથે જોડાયેલો. આજે જે મારા ગુરુ છે વાસુદેવજી મહારાજ જેમણે જ ફિલ્મ બનાવી હતી. તે ફિલ્મ મે ગોવિંદભાઈની ભલામણથી કરી હતી. સંત શ્રી સવાભગત.

n  ગજ્જર નીલેશ 

disha patel

નવી જનરેશનના પ્રોબ્લેમ વધુ હોય છે - દિશા પટેલ

    સાયબાને સથવારે ફિલ્મથી પોતાની કેરિયર શરૂ કરનાર દિશા પટેલ ટૂંક સમયમાં શૈલેશ શાહ નિર્મિત અને વસંત નારકર દિગ્દર્શિત ફિલ્મ ‘વ્હાલનો વારસદાર’ માં જોવા મળશે. એકદમ હસમુખો ચેહરો અને તેને જોતા જ દિલ ખુશ થઇ જાય તેવું ભાવવાહી સ્મિત દિશા પટેલનો પ્લસ પોઈન્ટ છે. દિશા પટેલ અત્યારે એક સાથે બે ફિલ્મો પર તૈયારી કરી રહી છે જેમાં એક તો મે હમણાં જ કહ્યું તે અને બીજી છે ‘ધમો ધમાલિયો’ જેના વિષે પણ આપણે તેઓ પાસેથી જાણીશું. ‘વ્હાલનો વારસદાર’ ફિલ્મમાં તે હીરોના જે એક બોસ છે તેની સેક્રેટરીનું પાત્ર ભજવી રહી છે. ગુજરાતી ફિલ્મોમાં જેમ હિરોઈનો ચણીયા ચોળી કે ઘાઘરામાં જ જોવા મળે છે તેનાથી અલગ આ ફિલ્મમાં દિશા પટેલનો લૂક તદ્દન જુદો છે. લૂક બાબતે દિશાએ કહ્યું કે મને આ લૂક ખૂબ જ પસંદ આવેલો. કોર્પોરેટ સ્ટાઈલનો લૂક પસંદ કરવામાં આવ્યો છે. ફિલ્મ પ્રણય ત્રિકોણ પર આધારિત છે જેમાં ગુજરાતી ફિલ્મોના હંમેશા પોતાની દરેક ફિલ્મે કંઇક નવું આપતા શૈલેશ શાહ પાસેથી આપણી અપેક્ષાઓ પણ વધી જાય છે કે આ ફિલ્મ પણ બધી ફિલ્મોના વિષય કરતા જુદો વિષય લઈને આવે.

    શૈલેશ શાહ અને વસંત નારકર વિષે પૂછતાં દિશા પટેલે જણાવ્યું કે શૈલેશ શાહ સાથે હું પ્રથમવાર કામ કરી રહી છું. અત્યારે હું ફિલ્મના ફ્લોર પર જ છું. ફિલ્મનું શૂટ ચાલુ છે પણ મને થોડો સમય મળ્યો એટલે તરત થોડો થાક પણ લાગ્યો હતો એટલે બેસી હતી. અહીં કલાકારો માટે તમામ પ્રકારની સવલતો મળે છે જે મે શૈલેશ શાહના નિર્માણમાં પહેલી જ વખત જોયું છે બીજી ફિલ્મોમાં પણ સગવડો મળે જ છે પરંતુ હું અહીં આ યુનિટમાં નવી છું એટલે મને હજી અહીં સેટ થતા થોડી વાર લાગશે. ફિલ્મના દિગ્દર્શક વસંત નારકર ખૂબ જ સારા માણસ તરીકે અને દિગ્દર્શક તરીકે તો સારૂ કામ લઇ જાણે છે. તેમની પાસે ઘણા વર્ષોનો અનુભવ છે. જેના દ્વારા અમને પણ તેમની પાસેથી ઘણું શીખવા મળે છે.

પ્ર – ‘ધમો ધમાલિયો’ ફિલ્મ વિષે?

ઉ – ‘ધમો ધમાલિયો’ ફિલ્મ હીરાલાલ ખત્રીની છે. નિર્માતા યોગેશ પટેલ છે. જેમાં મારૂ પાત્ર રઈસ ખાનદાનની દીકરીનું છે જે નાનપણથી જ ધમા સાથે રમીને મોટી થયેલી હોય છે. ગુજરાતી ફિલ્મોમાં જેમ બનતું આવ્યું છે તેમ નાનપણના મિત્રો એક યુવક અને એક યુવતી મોટા થઈને પ્રેમમાં પડે છે અને બીજી પણ એક વાત કે કાં તો યુવતી ગરીબ અને યુવક અમીર હોય છે અથવા તો તુવતી અમીર અને યુવક ગરીબ હોય. આવું જ અહીં પણ આ ફિલ્મમાં છે. જેમાં કાંટારૂપ હિરોઈનનો ભાઈ નથી ઈચ્છતો કે તેની બહેનની પાછળ કોઈ ગરીબ ઘરનો યુવાન પડે અને તેને પ્રેમ જાળમાં ફસાવે. તે પણ સાચી વાત છે કે દરેક ભાઈ તેની બહેનનો ખ્યાલ તો રાખતો જ હોય છે.

પ્ર – આપના ફિલ્મ દરમિયાનના અનુભવો વિષે કહેશો.

ઉ – ઘણી જગ્યાઓ પર એવું થયું છે કે ટાઈમસર કોઈ વસ્તુ ના આવે. ઘણી મુશ્કેલી પડે. સારા અનુભવો પણ થાય અને કડવા અનુભવો પણ થાય. ખરાબ અનુભવોને ધ્યાનમાં રાખીને હું આગળ વધુ છે એ એટલા માટે કે, એ બીજી વાર રીપીટ ન થાય.

પ્ર – ફિલ્મના નિર્માતા દિગ્દર્શક વિષે?

ઉ – ફિલ્મ સ્વીકારવાનું મુખ્ય કારણ એ જ છે કે હીરાલાલ ખત્રી સાથે મારે ઘણા જુના સંબંધો છે. એમની સાથે અગાઉ પણ મે એક ફિલ્મ કરેલી ‘જીંદગી લખી મે તો પીયુ તરે નામ’ એમનો મને ફોન આવ્યો અને ભાર દઈને કહ્યું કે આ ફિલ્મમાં મને તું જ જોઈએ. મને તે રોલ પણ ખૂબ પસંદ આવેલો જેમાં બીજી રેગ્યુલર ફિલ્મો કરતા તે પાત્ર મારા માટે ખૂબ સરસ લખાયું હતું. ફિલ્મના નિર્માતા યોગેશ પટેલ ફિલ્મમાં મારા બોસ છે. તેમના વિષે કહીશ કે તેઓ નિર્માતા તરીકે બહુ જ સારા વ્યક્તિ છે.  

n  ગજ્જર નીલેશ 

mehul buch

સન્ની લીઓન સાથે મેહુલ બુચ ‘કુછ કુછ લોચા હૈ’ અને ‘વ્હાલનો વારસદાર’ તો ખરી જ  

    નિર્માતા શૈલેશ શાહની ફિલ્મ ‘વ્હાલનો વારસદાર’ ફિલ્મ હાલ શૂટમાં છે. જેમાં દિગ્દર્શન કરી રહ્યા છે વસંત નારકર અને ફિલ્મમાં હિન્દી ફિલ્મો અને ટીવી સીરીયલોમાં મોટું નામ અને કામ ધરાવતા મેહુલ બુચ પણ આ ફિલ્મમાં જોવા મળવાના છે. આ અગાઉ તેઓએ લગભગ ત્રણથી ચાર જ ગુજરાતી ફિલ્મોમાં અભિનય આપ્યો છે જેમાં એક હમણાં જ આવેલી ‘હરપાલદે શક્તિના અમર અજવાળા’ હતી. તે ફિલ્મ પણ તેઓએ ઘણા લાંબા સમય બાદ કરી હતી. તેઓ ગુજરાતી ફિલ્મોથી એકદમ વિમુખ થઇ ગયા હતા. પરંતુ હવે પહાડી અવાજના માલિક મેહુલ બુચ ફરી ગુજરાતી દર્શકોને મનોરંજન પીરસવા આવી રહ્યા છે જેનો શ્રેય તેઓ શૈલેશ શાહને આપે છે. કારણ પૂછતાં તેઓએ જણાવ્યું કે તેઓનું નામ મે સાંભળેલું કે તેઓ ગુજરાતી ફિલ્મોમાં કંઇક નવીનતા લાવવા દરેક ફિલ્મે નવો કોન્સેપ્ટ લઈને ફિલ્મો બનાવે છે. એટલે મને ઉત્સાહ તો હતો જ કે એવી કોઈ ફિલ્મની ઓફર આવે એટલે લઇ જ લઉં. ‘વ્હાલનો વારસદાર’ એક બાપ અને દીકરાના સંઘર્ષની કથા છે. જેમાં ઘણી બધી ગેરસમજ સર્જાય છે. બાપ પોતાના નિયમો પોતાના સપનાઓ દીકરા થકી પૂરા કરવા માંડે છે. જેના કારણે બાપ દીકરા વચ્ચે સંઘર્ષ સર્જાય છે. આગળ જતા દીકરાના કેટલાક અનિવાર્ય સંજોગોના કારણે અમુક એવી ઘટનાઓ આકાર લે છે જેના પરિણામે દીકરો બાપને નફરત કરતો થઇ જાય છે. જયારે સત્ય હકીકત સામે આવે છે ત્યારે બાપ તૂટી પડે છે. અંતે જીંદગીમાં બધું સાચવી જાય તેવી પરિસ્થિતિ આવે છે ત્યારે ઘણું મોડું થઇ ચુક્યું હોય છે. છેલ્લે બાપે દુખી થવાનો વારો આવે છે. પોતાના ખોટા અહમ અને જીવનની કેટલીક ગેરસમજને કારણે એક બાપ પોતાના વ્હાલના વારસદાર દીકરાને ખોઈ બેસે છે.

    ગુજરાતી ફિલ્મોમાં મેહુલ બુચે બહુ ઓછું કામ કર્યું છે જેમકે ૧૫ વર્ષ પહેલા આવેલી દેરાણી જેઠાણી, પછી આવી પાંખ વગરના પારેવા જેમાં તેઓને આત્મવિ શ્વાસ હતો કે આ ફિલ્મ માટે તેમને સ્ટેટ એવોર્ડ મળશે અને મળ્યો પણ ખરો. ત્યારબાદ ફિરોઝ ઈરાની અને દેવેન્દ્ર પંડિતે હરપાલદે શક્તિના અમર અજવાળા ફિલ્મના નિર્માતા જીતુભા જાડેજાને મેહુલ બુચનું નામ સૂચવ્યું. જેમાં તેમનું પાત્ર ખૂબ જ સરસ હતું પરંતુ તે ફિલ્મ જેટલી ચાલવી જોઈતી હતી તેટલી ચાલી નહિ અને નિરાશા સાંપડી. હિન્દી ફિલ્મો અને તીઓવી સીરીયલોમાં તેઓ એટલા બધા બીઝી હોય છે કે તેઓ ગુજરાતી ફિલ્મો માટે ભાગ્યે જ સમય ફાળવી શકે છે. અચાનક એક દિવસ તેમના મોબાઈલની રીંગ વાગી સામેથી અવાજ આવ્યો ‘મેહુલ બુચ બોલો છો?’ જવાબ મળ્યો હા. તે ફોન હતો વ્હાલનો વારસદાર ફિલ્મના નિર્માતા શૈલેશ શાહનો જેમણે તેમની આગામી ફિલ્મ માટે મેહુલ બુચને તેમના માટે કે એમ કહો કે તેમને ધ્યાનમાં રાખીને જ લખાયેલા રોલ માટે ઓફર કરી. મેહુલ બુચ તો જાણતા જ નહોતા કે શૈલેશ શાહ કોણ છે. પરંતુ અત્યારે તેઓ તેમની સાથે કામ કરીને કહે છે કે ‘ગુજરાતી ફિલ્મ ઇન્ડસ્ટ્રીઝમાં આ લેવલનું પ્રોફેશનાલિઝમ મે નથી જોયું. એ માણસ ખૂબ જ સ્પષ્ટ, પારદર્શક અને ખૂબ જ પ્રોફેશનલ વ્યક્તિ છે. કદાચ હું એમ કહીશ કે આજ પછી હું ગુજરાતી ફિલ્મ વધારે કરીશ તો તેના કારણમાં શૈલેશ શાહ હશે. સાથે સાથે ફિલ્મના દિગ્દર્શક વસંત નારકર એકદમ નિખાલસ માણસ. પોતે પોતાનું કામ જાણે છે. ક્યારેય પણ તેઓએ મને મારા કામનો ભાર નથી બતાવવા દીધો. બહુ જ શાંતિથી કામ કરે છે. પંદર દિવસનું કામ ક્યારે પતી ગયું એ મને પણ ખબર નથી. એટલું સરસ શુટિંગ પૂરું થયું કે કોઈ બુમાબુમ નહિ, કોઈ કકળાટ નહિ અને મને પણ એવી જગ્યાઓ પર જ કામ કરવું ગમે છે જ્યાં ખોટા ઉપજાવેલા ટેન્શનો ન હોય.

પ્ર – જીત ઉપેન્દ્ર સાથેની તમારી કેમેસ્ટ્રી?

ઉ – જીત ઉપેન્દ્ર સાથે હું આ બીજીવાર કામ કરી રહ્યો છું. પ્રથમ ફિલ્મ હતી ‘હરપાલદે શક્તિના અમર અજવાળા’ જેમાં અમે બંને સાથે હતા. જીત અને હું એવા મિત્રો છીએ કે હું એને હંમેશા ‘બોસ’ કહીને બોલાવુ છું અને તે મને ‘ટાઈગર’ કહીને બોલાવે છે. અમારે આ લેવલના  સંબંધો છે અને વ્યક્તિ વિશેષ છે તે મારા માટે.

    આ ઉપરાંત ખુશીની વાત એ છે કે આ જયારે લખાઈ ચુક્યું હશે ત્યારે તો મેહુલ બુચની એક હિન્દી ફિલ્મ રીલીઝ પણ થઇ ગઈ હશે. તેઓ એક હિન્દી ફિલ્મ ‘કુછ કુછ લોચા હૈ’ માં સન્ની લીઓન સાથે ફિલ્મી પડદે આવી રહ્યા છે. આ વિષે જયારે તેમને પૂછવામાં આવ્યું ત્યારે તેમણે જણાવ્યું કે, હું કુછ કુછ લોચા હૈ’ ફિલ્મને લઈને ખૂબ જ ઉત્સાહિત છું. કારણ કે મુંબઈમાં ચારે બાજુ મે તે ફિલ્મના મોટા મોટા પોસ્ટર્સ જોયા છે. સન્ની લીઓન અને રામ કપૂર જેવા કલાકારો સાથે કામ કરવાનો મોકો મળે તે ગૌરવપ્રદ બાબત છે. સૌથી વધારે આનંદ મને એ વાતનો છે કે ક્યારેક એવા પાત્રો મળે કે જેના માટે અમારે તૈયારીઓ ન કરવી પડે અને તે અચાનક થઇ જાય. ‘કુછ કુછ લોચા હૈ’ મારૂ પાત્ર રામ કપૂરના મિત્ર તરીકેનું છે. નોર્મલ મારા દેખાવ પ્રમાણેનું જ પાત્ર છે પણ અચાનક મારો ગેટઅપ એકદમ ચેન્જ થઇ જાય છે. પહેલા હું કંઇક જુદો હોઈશ અને અંતે કંઇક જુદો જે દર્શકોને જોવાની મજા પડશે. આખો દોઢ મહિનો અમે મલેશિયામાં રહીને અમે શૂટ કર્યું જ્યાં ખૂબ ધમાલ મસ્તી કરી હતી અમે લોકોએ. સન્ની લીઓન માટે મારે ખાસ એક વાત દર્શકોને જણાવવી છે કે સન્ની લીઓન એક એવી અભિનેત્રી છે જેની દરેક લોકો સારી નરસી વાતો કરે છે. મારા મનમાં પણ એક ડર હતો કે સન્ની લીઓન સાથે કામ કરૂ કે નહિ. તે કેવું કોઓપરેટ કરશે? અત્યારે મને ખુશી એ વતની છે કે સન્ની લીઓન મને મારા પર્સનલી ઓળખે છે. એના જેવી પોઝીટીવ વ્યક્તિ મે સેટ પર જોઈ નથી. એને ફક્ત કામ જ કરવું છે અને એટલી બધી શાંત છે કે કોઈ દિવસ કોઈની પણ સાથે ઝઘડો હોય જ નહિ. કોઈ ડિમાન્ડ નહિ. સરળતાથી કામ કરે કે ન પૂછો વાત. મને પૂછે કે મારી એક્ટિંગ બરાબર થઇ રહી છે કે નહિ?  

n  ગજ્જર નીલેશ